في انتظار أن تظهر الحقيقة.. هل الأبناك المغربية غير قادرة على حماية اموال زبنائها !! حسب روايته، عمرو كامل و هو يضرب فتمارة خدام فالبني بمئة درهم للنهار، تا جمع فيها 17 مليون ناوي يبني بيها دويرة لوليداتو نواحي أكادير .. كاع لي جمعها كيديها كل أسبوعين أو ثلاثة يحطها فالبنك.
آخر مرة كانت نهار 7 فالشهر لي فات، غايجي يحط 2000 درهم، كيلقى فلوسو باقية، رجع نهار 16 فنفس الشهر يحط شي بركة أخرى، كيلقى الحساب خاوي خلاو ليه 300 درهم.
قالوا ليه غير البارح شي واحد سحب ذيك 17 مليون على 8 دفعات فظرف نص نهار ، رغم أن السحب كيتم بالكارني و بطاقة التعريف فقط، و السيد ما عندو لا بطاقة لا شيك، كيسولهم شكون هاذ الواحد كيقولو ما عرفناش، اشنو الحل، صيفطو ليه موظفة قالت ليه ما عندنا ما نديرو ليك !!!
البنك عندهم الكاميرات عندهم كلشي، عارفينو ماشي هو لي خرج الفلوس و هو كيقول أنا كنت خدام نهار خرجت الفلوس من 6 الصباح حتى 7 العشية و عندي اكثر من شاهد، و ما بغاو يقولو ليه لا شكون خرج الفلوس لا الوكالة منين خرجات ، و المدير رافض يستقبلو من نهار وقعت الكارثة رغم انه بقى معتصم ليهم امام البنك لمدة أسبوعين.
السيد شاك فشي اختلاس من داخل البنك لانه يعتقد أن لي سحب الفلوس عارف شحال كاين فالحساب، وأنهم كيجرجروه باش تدوز شهرين ويتمسح أرشيف الكاميرات.
دابا هاذي تقريبا 40 يوم و هو كيجري، عقلو غادي يخرج و باقي ما دارو معاه والو، في انتظار تحريك الشكاية لي وضع عند وكيل الملك.
لا حول ولا قوة إلا بالله...
ليست هناك تعليقات:
إرسال تعليق